Espectáculo de marionetas de madeira para todos os públicos sobre o Entroido da Ulla.
Dúas xeneralas e dúas correos percorren as rúas dacabalo dando vivas e facendo os seus atranques.
Atención, donas e cabaleiros, digan todos a unha voz:
Viva a xente da Ulla e toda a súa familia!
Viva!!!
Viva a xente que nos rodea e mira!
Viva!!!
Viva a música e siga!
Viva!!!
Xan Laranxal e a macaquiña Kiku presentan esta gran aventura que comezou hai cincocentos anos, máis ou menos, cando, nun lugar do camiño, Gaiferos se atopou co Demo, que o desafiou ao xogo da Oca.
Tivo sorte cos dados o peregrino e gañou a partida ao do inferno, quen andivo por todo o Camiño facendo despropósitos e maleficios para detelo.
Anaet é unha rapaza honrada e bela. Un día Vachagán, o príncipe herdeiro do trono, disfrázase para percorrer o reino sen ser recoñecido. Cando coñece a Anaet namórase dela ao instante e pídelle matrimonio, pero Anaet pensa que ser príncipe non é un oficio e que, en canto aprenda unha profesión, estará encantada de ser a súa compañeira. O príncipe aprenderá a ser tecedor e mestre bordador, percorrendo Oriente para estudar a arte dos tecidos.
Pero un desafortunado secuestro separará aos namorados. Vachagán confeccionará unha tea moi especial que esconde unha mensaxe de auxilio e será decisiva na vida da súa comunidade.
Xiana e Xoel presentan un sorprendente mundo de seres extraordinarios no que se poden apreciar as diferentes especies, mariñas, terrestres e voadoras, que forman esta incrible atracción (entre atracción de feira e arte contemporánea) que será difícil de esquecer. Xunto ás grandes figuras aparecen pequenos seres que habitan en caixas máxicas ou monstros que saen dunha maleta, que nos traen lembranzas de personaxes mitolóxicos e dos petróglifos galegos.
Proxecto financiado pola Deputación da Coruña, dentro do programa de subvencións para a produción de Proxectos Singulares de especial interese cultural na provincia da Coruña 2022.
Pica aquí para coñecer os títulos dos nosos espectáculos e contacontos que inclúen actividades adicionais e entretidos xoguetes de papel.
Da señora Antonia din que é unha meiga. Será polo seu aspecto? Sombreiro picudo, nariz afiada, verruga no rostro, a costa encurvada, andar decidido e saia morada.
Ou polos seus amigos? Bandidos, pantasmas, morcegos e almas.
Pero a señora Antonia, a través de cinco historias, achegaranos a un mundo de tebras onde, co humor, o amor e o terrorrrrr, ímolo pasar de meeeeedooooo.
Os libros desta biblioteca tolearon. A todos lles ocorren cousas estrañas e misteriosas. Cada un ten unha historia que contar, como todos os libros do mundo, pero estes libros decidiron transmitila dun xeito diferente; por iso se converteu en barco o libro que recolle os relatos do mar, medroulle unha maceira ao que conta como naceron as palabras, quedou atrapado nunha arañeira un pequeno libro aventureiro… e así, un tras outro, vannos amosando as súas historias nesta biblioteca chea de fantasía.
Proxecto financiado pola Deputación da Coruña, dentro do programa de subvencións para a produción de Proxectos Singulares de especial interese cultural na provincia da Coruña 2022.
