XV Festival Internacional de Títeres Galicreques

Montaxe escénica de ambientación medieval sobre o Camiño de Santiago desde Francia a Compostela na que se conta a historia de Saira, unha rapaza francesa que viaxa a Galicia para curar o corazón de pedra da súa familia. A viaxe faina xunto cunha gárgola máxica destinada á Catedral de Compostela. Unha viaxe que da comezo en Saint Jean Pied de Port e remata en Santiago, con lendas e personaxes propios do camiño e na que destaca o carácter que imprime Galicia dentro do mesmo: máscaras do entroido, danzas, gastronomía e música propias que viaxan por Europa ao longo da Historia.
Unha produción conxunta da Xanela do Maxín e a Fundación Galicia Sustentable co-financiada coa liña de Axudas de «O teu Xacobeo».

Fantástica recreación para marionetas baseada no relato de Lewis Carroll “Alice’s Adventures in Wonderland”.
Conducidos polo Coello Branco, seguiremos con expectación as aventuras da pequena Alicia nese mundo onírico e fantástico que late debaixo da terra.
Alí merendaremos coa Lebre de Marzo, o Sombreireiro Tolo e o Leirón. Xogaremos ao cricket coa Raíña de Corazóns e… coidado Alicia! estás a medrar de novo e caeremos todos polo chan!

O mundo perdeu a súa cor e volveuse gris. Os desfeitos, terribles criaturas, todo o reinan e todo o cobren.
Alguén queda, xunto á súa escoba pasa os seus días varrendo esa onda de desperdicios que sempre volve. Alguén queda, coa esperanza e o desexo de xerar un cambio. Gaia Baba, a última bruxa.

Nino & Mambrú, os irmáns limpabotas.
Vide ver aos últimos do seu gremio.
Vide ver a súa técnica fina, milenaria.
Vide ver e a ter á vosa mercé a estes dous servos dos zapatos do pobo.
Que o fagan ben ou mal, xa é outro cantar, pero vide.
Vide velos!

Velocíclopes é un espectáculo conformado por varios sketchs, O propietario, Ser ou non ser e Os bos modais, onde a través da utilización dunha linguaxe plástica surrealista amósase o absurdo do comportamento humano en situacións propias da vida cotiá (a furia que aparece cando nos poñemos ao volante, o sentido da propiedade, a importancia de aparentar socialmente…)

Gasas, cintas, cordas… calquera elemento cobra vida cando se cruza no camiño do estrambótico protagonista deste show.
As marionetas son creadas en escena por Barallocas, un persoeiro distraído que ve un helicóptero nunha corda ou nunha tea un bailarín máis alto ca el.
Unha sorte de sketchs de humor absurdo, que mesturando unha coidada manipulación de obxectos, máscaras e pantomima, trasládanos dende a selva a un gran ballet ruso nun pestanexo.
A abstracción de Barallocas non ten límite!

Teatro Don Roberto – historias que encantan hai máis de 300 anos. Unha tradición que chegou até nós vinda dos mestres monicrequeiros italianos no século XVII. O uso dunha palleta metálica para emitir as voces dos personaxes aínda hoxe é un misterio e un reclamo de público nesta arte. Estas peripecias son contadas á semellanza doutros tempos, cruzando moitas xeracións de público, traendo aínda hoxe alegría, interacción e entusiasmo a nenos dos 3 aos 103 anos.

Finisterrae: O último ultramarinos conta a historia de Berto e Mónica, veciños dunha vila da Costa da Morte con percorridos vitais moi diferentes que son como dúas caras da mesma moeda. Mónica encarna o entusiasmo de quen devece por retornar á súa terra, mentres Berto representa a apatía de quen tivo que ficar obrigado. A través do seu encontro despois de varios anos, asistimos a unha estampa particular da Costa da Morte; do seu pasado e presente, pero tamén dun futuro aínda por construír.
Finisterrae: O último ultramarinos é tamén un retrato da situación que atravesan moitas pequenas vilas afastadas dos grandes núcleos, que padecen un despoboamento progresivo e que se adaptan como poden aos cambios económicos e sociais que están a redefinir a súa identidade e o seu porvir.

Un grupo de personaxes estrafalarios atopa o seu lugar no mundo dentro do Circo Malvarrosa. Trátase dunha recreación poética e marionetística dos pequenos circos familiares que outrora percorrían Europa. O pallaso Coscorrito, o anano Capodimonti, Coloso Cartoni e Signorina Papelina, Arístides Manobianca, Mauricio e Martinica, Dona Rosa Proído e o Marqués de Malva compoñen entre todos un circo estraño e sorprendente que fará as delicias de grandes e pequenos.