XV Festival Internacional de Títeres Galicreques

A nosa historia conta a desventura de Juancito, un humilde panadeiro que está a punto de ser enganado polo demo, o seu eterno rival, quen lle ofrece axuda para facerse rico e conquistar o corazón de María. Pero só hai un par de detalles que resolver, María é noiva de Juancito e o demo pretende quedar coa alma do panadeiro.

Dende sempre, a misión das cegoñas adultas foi a de levar os bebés recén nacidos ao carón dos seus pais. Pero un día esquecéronse dun pano e Güily, unha cegoña pequeniña, decidiu que xa era maior para levarlle o bebé aos seus pais, aínda que non sabía que xusto ese era un un bebé moi peculiar…
Aquí comeza a gran aventura e a nosa historia chea de música, humor e diversión, que realza a importancia da amizade, a solidariedade e a familia pero, sobre todo, de “voar” sempre en grupo e nunca só, para podernos protexer dos perigos que nos poidamos atopar…

Uxío é un neno de 7 anos que quere chegar a ser un Gran Mago, aínda que a súa realidade dille todos os días que non é posible. Ata que un día, a través dun soño, todo cambia.
Nese soño comezan a pasar cousas extraordinarias… Que pasará cando Uxío esperte? Sen dúbida unha historia envolvente que nos demostra que, para conseguir algo, só hai que desexalo con moita forza.

Espectáculo de cachiporra tradicional que recupera o personaxe galego máis popular do teatro de títeres na Galiza dos anos cincuenta: Barriga verde. Títeres Alakrán da vida ao mítico Barriga verde, que reaparece coa súa característica voz amplificada a través da palleta. O espectáculo conta cunha posta en escena actualizada aos tempos e á sociedade de hoxe, pero sen perder a máis pura esencia deste teatro vernáculo. En Barriga verde ataca de novo non faltarán os números clásicos do militar, a tourada, o enterro e, por suposto, o Demo.

Recreación da historia de Brancaneves con teatro, música en directo e marionetas de mesa talladas en madeira.
A historia desenvólvese ao redor dunha gran lareira na que un vello rei lembra as aventuras da súa pequena filla Brancaneves e os encontros que ela tivo cos misteriosos sete personaxes do bosque.

Unha noite de lúa chea,
cando un feixe de estreliñas bailaban a muñeira,
un rato moi pequeno e distraído,
ollando a lúa quedou durmido.
O señor gato contemplaba
o mesmo redondo prato
e como este suxería comida,
mirou para o rato con moita alegría.

Bruno, carteiro oficial do Correo Postal Titiriteiro, leva cartas e encomendas montado nunha motocicleta para marionetas. Todos os días, a primeira carta que entrega é para a súa amada María. Cada destino, unha aventura e cada destinatario, un misterio. Alá vai cumprir o seu deber Bruno Estampilla, un carteiro de marabilla.

Cóctel está composto por catro historias.
“Conversacións con Luis”: Monicreque e monicrequeiro charlan, intentan convivir. Rabechas adolescentes ou formulacións sumamente adultas, pero quen manda?
“Papelin”: Un paquete de panos na súa carreira por converterse en papel hixiénico, os conflitos dun adolescente en plena puberdade.
“A morte”: A osuda é quen abre este espectáculo: ao actor chegoulle a súa hora.
“A Nely”: Ela sabe que é un monicreque, unha señora de barrio sinxela, tocada polos problemas cotiáns. O monicrequeiro improvisará e xogará co que brote a partir do público presente.

Un espectáculo familiar que invita ao público a interactuar a través de tres divertidas historias.
Un monstro do centro da terra parece un terrorífico ser. Pero rapidamente descubriremos que, en realidade, é un sociable e tenro monstro alaranxado.
Un cuadrilleiro chamado Perigo vén decidido a conquistar o mundo e buscará entre o público aos seus novos secuaces. Conseguirá encontrar algún neno “malvado” que lle axude a concretar o seu maléfico plan ou será máis forte o desexo de protexer o noso planeta e os seres que viven nel?
Manu e o seu monicreque, Luis, intentan poñerse de acordo sobre quen dos dous manda, un conflito clásico onde Luis ensinará a Manu a ver as cousas dende outro punto de vista.

Mieke e Chris presentan un orixinal espectáculo popular de monicreques bailaríns. Son tallas de madeira, realizadas por eles mesmos, que cobran vida ao son dos variados instrumentos que tocan (gaita, frauta, tamboril, zanfona…) A rexión flamenca de Limbourg estará presente, representada por esta parella de artesáns, músicos e animadores de marionetas.