XV Festival Internacional de Títeres Galicreques

Un botón vermello asoma da cabeza de Clott e convérteo nun neno diferente. Vive tranquilo no campo, amando a natureza, pero un misterioso personaxe está demasiado interesado en que Clott quite o botón. Ofrécelle todo: unha nave espacial, un coche, diñeiro… Clott está tentado e comeza a ver no seu botón un poder insospeitado.

Lucía é unha bailarina con antecedentes de violencia, o que desencadea un cadro de dependencia afectiva e Bulimia.
Así chega ao límite, decidindo contar a súa historia a través do seu corpo, da súa danza e da súa voz, co único desexo de que xurda o amencer na súa alma.

divertida versión de tres capítulos de Don Quixote que se sitúan en Aragón e que se centran na figura de Maese Pedro, titiriteiro inmortalizado por Cervantes.

Un espectáculo baseado no libro homónimo de Manuel María.
Mimí, un gato presumido moi orgulloso do seu bigote, involucra a todo un grupo de música para contarnos como un bo día, deixándose engaiolar polo seu amigo Fiz, tivo que medirse cos ratos e a piques estivo de se converter no cazador cazado…

Coa súa carga de bonecos o titiriteiro aparece ante o público e, ao estilo dos contos medievais, conta a historia de Meñique, un neno tan pequeno que durmía na bota do seu pai e tan intelixente que derrotaba meigos, xigantes e maleficios.

Cineamano toma a forza do cinema para expoñer en gran formato secuencias de imaxes e debuxos que van creando unha narrativa visual efémera. A súa execución en vivo permite contemplar o proceso creativo, narrando historias urbanas, rueiras, que se potencian co trazo expresionista, graffiteiro.

Presentámosvos os “Contos para pasalo de medo”. Cinco historias de terror con amor e humor, narración oral, monicreques e elementos visuais. Contos que axudan a vencer os medos, pensados para rapaces e rapazas de 3 a 12 anos.

Pícolo e Margarita elixiron por oficio ser serenateros. Cantan historias que se entrecruzan co amor, a liberdade, os soños e coa esperanza de… que acaben todos os problemas, xogando á rolda de pan e canela. Unha posta que integra o teatro e a música a través de dous personaxes que co humor e o disparate convidan á familia para compartir un novo encontro.

Unha avoa conta a historia dun pintor que viviu na súa casa cando ela era nova: Trucas, un artista plástico rueiro, que protagonizou unha loita entre os seus ideais e os seus medos. A posibilidade ou non de poder realizar a súa vocación, a súa obra, a súa arte.

“Telón de Cielo” está baseado en pantomimas e historias sen palabras do autor e titiriteiro Guaira Castilla. O tamén titiriteiro Víctor Biau pon en escena esta poética obra, que recupera a maxia dos bonecos de trapo. Historias de flores, de nenas, de malos, de bos, de durmidos, de soñadores.